هر دوستو داغ سانيب فخرين ائيلمه

چوخ داغنين باشيندا دومان گورموشم

آلدانيب يامانا تئز دئمه ياخشی

من نئچه ياخشی نی يامان گورموشم

 

حاق سوزون آغيزدا قالاجاق دادی

ناحاققين ايته جک شوهرتی ، آدی

من نئچه چوخ بيلن ، نئچه اوستادی

واختيندا ساوادسيز نادان گورموشم

 

قيش گليب بوروير ، باهاری – يازی

آغی يا دوندرر گوزل آوازی

من نئيچه آنلاماز نئچه قانمازی

يرئنده ديل بيلن ، قانان گورموشم

 

تيکانلار گورموشم گول بوداغيندا

کام سيزلار گورموشم جاوان چاغيندا

من بو آز ياشيمدا حاق اوجاغيندا

چوخلارين آليشيب يانان گورموشم

 

 

 

اوشاق وار اوپمه سن دونوب اينجيير

اوشاق واربئنوا هئی جيريق گئير

اوشاق وار هميشه ات باليغ يئير

اوشاق وار بلله سين ياوان گورموشم

 

آی مهران ساخلا بو غملی دفتری

دونيانين هئچ ايشين توتما سرسری

ظولم ايله يئغيلميش لعلی ، گوهری

عاغليمين گوزونده سامان گورموشم