دل نوشته

مصرین دیلین آچدیم دئیه کنعاندی عزیزیم

یاخشی پیسه, پیس یاخشی یا نئیلر بو جاهاندا؟

دردیله زولیخامیزا درماندی عزیزیم

الدن توتانین چکمه آیاغین ییخیلارسان

نوح اوغلونو بوغمازسا بو طوفاندی عزیزیم؟

او ائو کی ییخیلدی قارا گونده آغاریلماز

قارداشینا حئیوان دئمه انساندی عزیزیم

اوندان یوموشاق کؤنلومو دارتدین کی نه اولسون

توی صاحیبی یاس توتسا چؤرک قاندی عزیزیم

تویدا حنا یاخماق بیزه عادتده اولورسا

آمما قارا یاخماق یوزه یوز ماندی عزیزیم

مهمان یئرینی بیلمه سه ائو صاحیبی دینمز

قورباندا کسیلمیش قوزو قورباندی عزیزیم

گنج ایله قوجا یولدا چتین یوللاشاجاقدیر!

مسجدده کلیسا سؤزو کفراندی عزیزیم

آللاهیلا یولداشلیق ائدن آز گتیرمز قان

اوندان اومانین مسکنی رضواندی عزیزیم

دونیا سنه اوز وئرمه سه آستارینی ییرتما!

یوخسوللوغوم حاتم لره احساندی عزیزیم

هر کیمسه دن اومسان متحیر الین آچما

بئش گوندو بو دونیا هامی مهماندی عزیزیم